Дописници МКДОпштински вести

Бадникова поворка во Дебар

Педесеттина деца од Дебар и од неколку села од подрачјето на Река, придружувани од нивните родители и други верници учествуваа во „Бадниковата поворка“.

Дебар, 6 јануари 2020 (МИА) – Педесеттина деца од Дебар и од неколку села од подрачјето на Река, придружувани од нивните родители и други верници учествуваа во „Бадниковата поворка“.

Децата тргна од кај кружнот тек, во близина на општината, носејќи во раце златни ѕвездички и пештера – симбол на витлеемската пештера, во која е роден Исус Христос и пеејќи ја песната „Вечниот бог“, поминаа по главната улица „Осми септември“, новото шеталиште па се до црквата „Света Петка“, во долниот дел на градот.

Таму беа пречекани од намесникот на дебарската парохија, Миле Ангеловски кој учесниците во поворката ги дарува со пакетчиња, обезбедени од повеќе донатори.

– За сите верници бадниковата поворка што се организира по повод Христовото раѓање е најубавиот настан во годината. Во Дебар оваа стара традиција беше обновена минатата година. Годинава за разлика од лани има повеќе дечиња, како и верници. Се надеваме дека до година ќе не има уште повеќе, велат Надица Стефановска и Ленче Ангеловска, кои со нивните деца беа дел од поворката.

Бадникова поворка во Дебар по првпат беше организирана минатата година благодарение на сестрите од манастирот во Рајчица а со благослов на игуменот на Бигорскиот манастир, Архимандрит Партениј.

Синоќа,спроти Бадник,во населбата „Венес еден“,каде што е поголема концентрацијата на православни Македонци,беше запален коледарски оган. Годинешните кумови Тања и Саво Савески обезбедија богата трпеза, а најсреќно беше семејството на Сузана и Слободан Јосифовски, зашто паричката се падна кај нивната ќерка Јованка. вт/цр/

Back to top button
Close
Close