Shkup, 5 shtator 2026 (MIA) - Prokuroria Themelore Publike për Ndjekjen e Krimit të Organizuar dhe Korrupsionit ka hapur një hetim kundër një punonjësi të Shërbimit të Punëve të Përgjithshme dhe të Përbashkëta të Qeverisë, i dyshuar për veprën penale "Marrja e shpërblimit për ndikim të paligjshëm".

Sipas Prokurorisë, ekziston dyshimi i bazuar se i dyshuari, i cili punonte si shofer për një zyrtar të lartë qeveritar, në periudhën nga 24 korriku deri më 4 shtator të këtij viti ka kërkuar 1.500 euro nga një qytetar me qëllim që të përdorë ndikimin e tij të supozuar dhe të ndërmjetësojë me zyrtarët në Qytetin e Shkupit në lidhje me punësimin sipas një konkursi për rekrutimin e zjarrfikësve.

Rasti është raportuar nga qytetari i dëmtuar, pas së cilës Njësia për Korrupsion në Byronë për Siguri Publike, në koordinim me prokurorin publik kompetent, ka ndërmarrë veprime për të siguruar dëshmi.

"Pas raportimit, autoritetet kompetente, në koordinim me prokurorin në fjalë, kanë ndërmarrë veprime për të siguruar dëshmi. Më 4 shtator të vitit 2026, i dyshuari u kap duke dorëzuar 500 euro si pjesë e shpërblimit të kërkuar prej 1.500 eurosh, të cilat më parë ishin shënuar", njofton Prokuroria.

Për shkak të rrezikut të arratisjes, mundësisë së ndikimit te dëshmitarët dhe rrezikut të përsëritjes së krimit, prokurori publik propozoi caktimin e masës së paraburgimit. Një gjykatës i procedurës paraprake e pranoi propozimin dhe urdhëroi që i dyshuari të mbahet në paraburgim për 30 ditë.

Ministria e Punëve të brendshme sot informoi se pas paraqitjes së parashtruar nga një qytetar, D.C., i punësuar si shofer në Shërbimin për punë të përgjithshme dhe të përbashkëta pranë Qeverisë së RMV-së, është hasur gjatë marrjes së parave paraprakisht të shënuara, pas çka është privuar nga liria.

Prokuroria thekson se është jashtëzakonisht i rëndësishëm raportimi në kohë i korrupsionit dhe gatishmëria e qytetarëve për të bashkëpunuar me institucionet kompetente. mb/

Foto: MIA