Tel Aviv/Bejrut, 6 shtator 2026 (MIA) - Të paktën katër persona janë vrarë dhe 20 të tjerë janë plagosur në sulmet izraelite në zonën Nabatije në Libanin jugor, raportuan mediat libaneze.

Ushtria izraelite sulmoi dhe shkatërroi gjithashtu spitalin "Gandur" në qytetin al-Nabatije al-Fauka, një strukturë që ka qenë jashtë funksionit për vite me radhë. Pati gjithashtu raportime për të lënduar.

Është kryer një sulm intensiv edhe në vetë qytetin Nabatije, ku objektivi kryesor ishte një ndërtesë historike në pronësi të vëllait të deputetit Naser Xhaber.

Sulmi shkaktoi gjithashtu dëme të mëdha materiale në ndërtesat e departamenteve rajonale të financave dhe bujqësisë në Nabatije, të cilat ndodhen në një ndërtesë në afërsi të vendit të sulmit.

Zyrat pësuan dëme të konsiderueshme, dritaret dhe dyert u thyen, dhe dokumentet dhe të dhënat u shpërndanë kudo. Dhjetëra dyqane dhe kafene pranë vendit të sulmit u dëmtuan gjithashtu.

Ushtria izraelite paraprakisht ka bërë të ditur se grupi militant libanez Hezbollah kishte sulmuar ushtarët izraelitë në Libanin jugor me dy dronë.

Anëtarët e Forcave Mbrojtëse të Izraelit qëlluan një nga dronët dhe asnjë ushtar nuk u plagos. Sipas ushtrisë izraelite, sulmi ishte një shkelje serioze e marrëveshjes së armëpushimit midis Izraelit dhe Libanit, duke vënë në dukje se Izraeli u kundërpërgjigj me sulme ndaj objektivave në Libanin jugor.

Portali izraelit i lajmeve "Ynet", duke cituar burime sigurie, raportoi se spitali në zonën Nabatije nuk ishte më në përdorim dhe se Hezbollahu po e përdorte atë si bazë. mb/

Foto: MIA