Londër, 6 shtator 2026 (MIA) - Udhëtarët që planifikojnë të hyjnë në Bashkimin Evropian mund të përballen përsëri me ndalesa më të gjata në kufij, pasi skadon sot periudha e zbatimit fleksibël të Sistemit evropian të hyrjeve/daljeve (EES).

EES parashikon regjistrimin elektronik të qytetarëve të vendeve që nuk janë anëtare të BE-së dhe mbledhjen e të dhënave biometrike, përfshirë gjurmët e gishtërinjve. Sistemi ka zëvendësuar vulosjen klasike të pasaportave gjatë hyrjes dhe daljes nga zona Shengen.

Dështimi i Komisionit Evropian për të zgjatur afatin për regjimin fleksibël zvogëlon mundësitë që autoritetet kufitare të pezullojnë përkohësisht leximin e të dhënave biometrike në pikat kufitare individuale në rast të turmave të mëdha dhe pritjeve të gjata.

"Guardian" i Londrës, duke cituar disa burime të informuara, shkruan se disa shtete anëtare të BE-së ende nuk do t'i zbatojnë plotësisht kontrollet biometrike, veçanërisht në disa pika kufitare të mbingarkuara.

Vendosja e sistemit ka shkaktuar mbingarkesë të konsiderueshme në disa aeroporte dhe pika kufitare evropiane, për shkak të problemeve teknike dhe kohëzgjatjeve më të gjata të kontrollit.

Komisioni Evropian njoftoi se ishte në kontakt me shtetet anëtare që kishin nevojë për rregullime të mëtejshme operacionale dhe ishte gati t'i ndihmonte ato në zbatimin e sistemit. mb/

Foto: MIA