Uashington, 19 korrik 2026 (MIA) - Forcat e armatosura amerikane njoftuan se kanë përfunduar serinë e tetë radhazi të sulmeve ajrore kundër forcave të Gardës Revolucionare Islamike (IRGC), duke goditur autorët e sulmit në të cilin humbën jetën ushtarët amerikanë.

Sipas Komandës Qendrore të SHBA-së (CENTKOM), sulmet u kryen në përgjigje të drejtpërdrejtë ndaj sulmit të fundit në Jordani. Kjo e përshkallëzoi më tej konfliktin ushtarak mbi Ngushticën e Hormuzit, e cila është strategjikisht e rëndësishme.

Armata amerikane konfirmoi se dy ushtarë u vranë, një është zhdukur dhe katër të tjerë u shtruan në spital pas sulmit iranian. Që nga fillimi i armiqësive, gjithsej 16 ushtarë amerikanë janë vrarë dhe më shumë se 430 janë plagosur. Nga ana tjetër, autoritetet iraniane thanë më parë se të paktën 50 persona u vranë dhe më shumë se 500 u plagosën në sulmet ajrore amerikane pas përshkallëzimit të ri të tensioneve në Gjirin Persik.

Sulmet, të cilat janë pjesë e një fushate më të gjerë ushtarake që zgjati më shumë se një javë, filluan rreth orës 3 të mëngjesit sipas kohës së Evropës Qendrore me urdhër të drejtpërdrejtë të presidentit të SHBA-së Donald Tramp.

"Sulmet kanë për qëllim të dobësojnë më tej aftësinë e Iranit për të kërcënuar trafikun detar tregtar përmes Ngushticës së Hormuzit dhe për të ndëshkuar shpejt forcat e Gardës Revolucionare të Iranit që kryen sulme ndaj trupave amerikane në Jordani", citohet në kumtesën zyrtare të CENTKOM.

Pas prishjes së marrëveshjes së përkohshme të armëpushimit, Irani nisi një seri sulmesh ndaj aleatëve të SHBA-së në Lindjen e Mesme, ndërsa SHBA shënjestroi ura, termocentrale dhe objektiva të tjera infrastrukturore në Iran. Në shenjë hakmarrjeje, Teherani nisi sulme ndaj termocentraleve dhe impianteve të desalinizimit në Kuvajt, duke prishur rëndë jetën e përditshme në vendin e pasur me naftë.

CENTKOM njoftoi se ishte hera e parë që sulmet konfirmoheshin zyrtarisht se kishin në shënjestër IRGC-në, strukturën kryesore ushtarake që kontrollon arsenalin e raketave balistike të Iranit. Sulmet kishin në shënjestër objektet ushtarake iraniane për mbikëqyrje bregdetare dhe mbrojtje ajrore, objektet detare, si dhe objektet e magazinimit të raketave dhe dronëve. Videot e publikuara treguan se sulmet u kryen nga aeroplanë luftarakë dhe raketa lundrimi "Tomahavk" të lëshuara nga deti. Një nga objektivat kryesorë ishte në një luginë malore ku forcat iraniane shpesh vendosin baza të fshehura raketash.

Irani ende nuk ka publikuar një bilanc të plotë të humbjeve nga sulmet e SHBA-së, të cilat kanë vazhduar prej tetë ditësh, ndërsa të dyja palët po përballen ushtarakisht me njëra-tjetrën për kontrollin e Ngushticës së Hormuzit - kalimi i ngushtë detar për në Gjirin Persik, përmes të cilit kalon rreth një e pesta e tregtisë botërore të naftës dhe gazit natyror në kohë paqeje.

Mediat iraniane raportuan se SHBA ka kryer një sulm pranë qytetit jugor të Sirikut, si dhe sulme në një zonë pranë qytetit Shadeghan, jo shumë larg kufirit irakian. Menjëherë pas kësaj, sipas televizionit shtetëror iranian, armata iraniane kreu një sulm të koordinuar me dronë ndaj objekteve ushtarake amerikane në bazën Al-Adiri dhe bazën ajrore "Ali al-Salem" në Kuvajt.

Në një deklaratë me shkrim të publikuar nga media shtetërore, udhëheqësi suprem i Iranit, Ajatollah Moxhtaba Hamenei, vlerësoi se veprimet e Uashingtonit treguan se nënshkrimi i Trampit ishte "plotësisht i pavlefshëm", duke paralajmëruar për një çmim edhe më të rëndë për SHBA-në. Deri më tani nuk ka pasur asnjë reagim zyrtar nga Shtëpia e Bardhë. sa/

foto: EPA