Gjenevë, 4 shtator 2026 (MIA) - Një nga depot kryesore të Organizatës Botërore të Shëndetësisë (OBSH) që ruan furnizime mjekësore humanitare në Ukrainë u godit gjatë natës gjatë një sulmi ajror në zonën përreth Kievit, bëri të ditur sot OBSH.

"Qasja në vend mbetet e kufizuar për shkak të tymit dhe shqetësimeve për sigurinë, ndërsa vlerësimet e dëmeve të mundshme dhe humbjes së furnizimeve janë duke vazhduar. Asnjë staf i OBSH-së nuk është prekur", tha zëdhënësi i OBSH-së, Kristian Lindmaer.

Sulmi vjen pas atij në gusht ndaj një depoje humanitare të OBSH-së në qytetin jugor të Dnjeprit i cili rezultoi në humbjen e gjysmës së furnizimeve dhe pajisjeve mjekësore të destinuara për të mbështetur rreth 225.000 njerëz që jetojnë në vijat e frontit dhe në zona të vështira për t'u arritur, thekson OBSH.

Një depo tjetër e përdorur nga OBSH-ja pranë Kievit u dëmtua gjatë një vale të madhe sulmesh ndaj kryeqytetit dhe rajonit përreth në korrik, tha Lindmaer.

"Sulmet janë pjesë e një modeli më të gjerë që ndikon në operacionet humanitare në gjithë vendin. Në vitin 2026, të paktën 20 sulme goditën depot për furnizime humanitare, duke përfshirë 15 sulme ndaj depove që përmbanin furnizime shëndetësore humanitare", deklaroi Lindmaer para gazetarëve në Gjenevë.

OBSH-ja thekson se pas incidenteve të fundit janë identifikuar marrëveshjet alternative të magazinimit.

Foto: Iks