Romë, 11 tetor 2025 (MIA) - Me fillimin e armëpushimit në Rripin e Gazës, Programi Botëror i Ushqimit (WFP) i Kombeve të Bashkuara me seli në Romë i ka bërë thirrje qeverisë izraelite që të lejojë urgjentisht ndihmën humanitare të hyjë në territorin e rrethuar, raporton DPA.

"Ky është një moment vendimtar për popullin e Gazës", tha Martin Frik, përfaqësues i WFP-së për Gjermaninë, Austrinë dhe Lihtenshtajnin, në një intervistë me grupin mediatik gjerman RND.

"Armëpushimi duhet të lejojë kalime të sigurta kufitare dhe garanci të qarta sigurie për transportin e ndihmës", theksoi Frik, duke shtuar se "çdo orë është thelbësore".

Sipas tij, 60,000 ton ushqim janë gati të hyjnë në Rripin e Gazës, dhe 100,000 ton të tjerë janë tashmë në rrugën e tyre drejt rajonit. Kjo sasi, nëse qasja është e sigurt dhe e vazhdueshme, do të ishte e mjaftueshme për të furnizuar popullsinë e Gazës për gati tre muaj.

"Në muajin e parë, ne mund të sigurojmë bukë, miell dhe pako ushqimore për 1.6 milion njerëz," tha Frik.

Ai kujtoi se Izraeli kontrollon aksesin në Gaza dhe duhet të lejojë kalimin e konvojeve me ndihma dhe të sigurojë sigurinë e tyre.

Armëpushimi midis Izraelit dhe Hamasi hyri në fuqi në mesditë të premten (09:00 GMT).

Pas një përparimi në bisedimet e paqes, Izraeli dhe Hamasi ranë dakord të enjten për fazën e parë të planit të paqes të presidentit të SHBA-së Donald Tramp, i cili kërkon lirimin e të gjitha pengjeve dhe tërheqjen e forcave izraelite në një vijë të rënë dakord reciprokisht në Gaza.

Organizatat ndërkombëtare e mirëpritën fazën e re të armëpushimit, duke paralajmëruar se "pa shpërndarje të shpejtë dhe të vazhdueshme të ushqimit, ujit dhe ilaçeve, katastrofa humanitare mund të vazhdojë pavarësisht armëpushimit". sa/

foto: arkivi