Shkup, 13 korrik 2026 (MIA) - Deputetja e BDI-së, Arbana Pasholli, në konferencën e sotme për shtyp theksoi se ajo që paraqitet si një rifreskim i Qeverisë me ndryshimet e reja qeveritare është, tha, në fakt vetëm një riorganizim i dështimeve dhe konfirmim se interesat politike kanë përparësi para interesit të qytetarëve. 

Potencoi se ministri aktual i Shëndetësisë, Azir Aliu, po largohet nga funksioni pa realizuar pothuajse asnjë nga premtimet që VLEN-i u bëri qytetarëve gjatë fushatës zgjedhore.

"Nuk ka reforma, nuk ka investime të shpallura, nuk ka përmirësim në shërbimet shëndetësore. Pas një viti dështimesh, përgjigja e vetme nga Qeveria është largimi i ministrit, jo korrigjimi i politikave të gabuara. Qytetarët me të drejtë pyesin: ku janë 74 milionë euro për Spitalin klinik në Tetovë, ku është parku memorial për spitalin modular. Gjithashtu, kur bëhet fjalë për Ministrinë e Shëndetësisë, largimi i ministres nuk është rezultat i objektivave të përmbushura, por një pranim i dështimit të plotë" tha ajo.

Potencoi se ministri po largohet pa përmbushur asnjë nga premtimet kryesore me të cilat VLEN fitoi besimin e qytetarëve. VLEN-i premtoi ndërtimin e gjashtë spitaleve rajonale në rajonet ku jetojnë shqiptarët. Ndërtimin e një Qendre Klinike Universitare në Tetovë si një qendër moderne për të gjithë rajonin perëndimor. Kontrolle shëndetësore falas një herë në vit për çdo qytetar. Pajisja e çdo komune me popullsi shumicë shqiptare me një qendër mjekësore emergjente dhe një ambulancë. Hapja e një qendre për mjekimin e plagëve dhe djegieve në mënyrë që pacientët të mos detyrohen të kërkojnë mjekim jashtë vendit", theksoi ajo.

Sot, siç theksoi deputetja, pas më shumë se dy vitesh qeverisje, asnjë nga këto premtime nuk është realizuar.

Pasholli theksoi se largimi i ministrit nuk përfaqëson as reformë dhe as përgjegjësi politike, por, siç tha, një pranim publik se VLEN-i nuk e mbajti fjalën e dhënë në sektorin e shëndetësisë.

Për BDI-në, tha ajo, shqetësues ishte emërimi i Ivan Stoilkoviqit në krye të Ministrisë së Vetëqeverisjes Lokale, sepse përderisa ai drejtonte Ministrinë e Marrëdhënieve ndërmjet bashkësive, institucionin përgjegjës për zbatimin e Marrëveshjes së Ohrit, ai lejoi që buxheti i kësaj ministrie të reduktohej tre herë për më shumë se dy vjet me radhë.

Pasholi potencoi se propozimi për Ministrinë e Drejtësisë është po aq problematik. Theksoi se personi i propozuar, siç tha, njihet për afërsinë e tij me Karakamishevan dhe për faktin se është ndër mbështetësit më të zëshëm akademikë të, sipas tyre, ligjit më skandaloz të kësaj qeverie, të ashtuquajturit Ligj për përfaqësim të drejtë dhe adekuat.

Pasholli potencoi se Bashkimi Demokratik për Integrim do të vazhdojë të mbrojë Marrëveshjen e Ohrit, përfaqësimin e drejtë dhe adekuat dhe interesat e qytetarëve, duke kundërshtuar çdo përpjekje për të dobësuar të drejtat e fituara dhe institucionet që i garantojnë ato.

Lidhur me takimin koordinues të paralajmëruar për sot me partitë opozitare të iniciuar nga E Majta, Pasholli theksoi se nuk ka informacion që ata kanë marrë një ftesë të tillë dhe nëse marrin një të tillë, do ta shqyrtojnë atë brenda partisë.

"Nuk jam në dijeni se ka ndonjë ftesë nga E Majta për ne. BDI, si në të kaluarën ashtu edhe tani, gjithmonë ka qenë për dialog institucional dhe përfshirje. Nëse marrim një ftesë të tillë, ajo do të shqyrtohet në organet e partisë dhe atje do të vendoset nëse duhet të marrim pjesë" tha deputetja Pasholli. rq/

Foto: MIA