Shkup, 14 gusht 2026 (MIA) - Fondi për sigurim shëndetësor njoftoi se po ndërmerr hapa konkretë, me të cilat pacientëve me organe të transplantuara do t'u mundësojë që ilaçi Myfortic (acid mikofenolik), në doza prej 180 mg dhe 360 ​​mg, si ilaç origjinator, të jetë përsëri i disponueshëm pa bashkëpagesë, e në të njëjtën kohë të mbahen përfitimet nga ulja e çmimit të kësaj terapie të arritur më parë. Siç informon Fondi, ky është ilaç me rëndësi të veçantë për pacientët me organe të transplantuara, të cilët e përdorin këtë terapi për një kohë të gjatë dhe për të cilët terapia e vazhdueshme dhe financiarisht e përballueshme është me rëndësi të jashtëzakonshme.

Në kuadër të aktiviteteve për të zgjeruar përzgjedhjen e ilaçeve pa bashkëpagesë, Fondi paraprakisht përfshiu ilaçe shtesë me emrin gjenerik acid mikofenolik në Librin e kodeve të ilaçeve. Në këtë mënyrë, informon, përveç zgjedhjes më të madhe për të siguruarit, në treg u krijua edhe konkurrencë e vërtetë, e cila kontribuoi në uljen e çmimit të Myfortic, e si rezultat i kësaj qasjeje, çmimi i Myfortic 180 mg është ulur për 291 denarë, ndërsa ai i Myfortic 360 mg për 2.012 denarë.

"Me rregullimin e propozuar të çmimeve referuese, të siguruarit nuk do të paguajnë shtesën prej 615 denarësh për Myfortic 180 mg, respektivisht 1.439 denarësh për Myfortic 360 mg, ndërsa ilaçi në të dy opsionet do t'u jetë i disponueshëm pa pagesë shtesë, pasi vendimi të hyjë në fuqi. Në të njëjtën kohë, falë uljes së çmimit të arritur më parë, kursimet e parashikuara për Fondin vetëm për gjysmën e dytë të vitit 2026 arrijnë rreth një milion denarë. Kështu, Fondi arriti një nga qëllimet kryesore të futjes së barnave shtesë në Listën pozitive - konkurrencë më të madhe dhe çmime më të ulëta, pa u transferuar barra financiare tek pacientët, e në të njëjtën kohë shfrytëzim më racional të fondeve nga buxheti i shëndetësisë, si dhe futjen e barnave shtesë në Listën pozitive - konkurrencë më të madhe, ulje çmimesh dhe përdorim më racional të fondeve nga buxheti i shëndetësisë", thuhet në kumtesë.

Ndërkohë, Fondi, siç thuhet, mori njoftim zyrtar nga bartësi i miratimit se dy barnat alternative të prodhuesit STADA, të cilat ishin përfshirë në Librin e kodeve si barna pa bashkëpagesë, aktualisht nuk janë të disponueshme në tregun vendas për shkaqe prodhuese-teknike.

Materiali do t'i dërgohet për shqyrtim Bordit të drejtorëve të Fondit në seancën e parë të ardhshme. Pas kësaj, lista e kodeve të barnave do të publikohet në faqen e internetit të Fondit. Me këtë, personat e siguruar do të jenë në gjendje të blejnë Myfortic 180 mg dhe 360 ​​mg pa pagesë shtesë. bsh/

Foto: MIA arkiv