15:00/ 16 gusht/ 2026

Shkup - Kryetari i Qeverisë, Hristijan Mickoski, sot inspektoi aktivitetet ndërtimore në kuadër të fazës së parë të ndërtimit të kanalizimit fekal në vendbanimin Idrizovë në Komunën e Gazi Babës.  Me projektin parashihet ndërtimi i një rrjeti të ri të kanalizimit fekal në gjatësi prej 1.478 metrash. Vlera e kontratës është 49.188.012 denarë, ndërsa mjetet janë siguruar nga thirrja e dytë publike e Qeverisë. 

Shkup - Kryeministri Hristijan Mickoski paralajmëroi aktivitet të intensifikuar ndërtimor, duke paralajmëruar ndërtimin e gjashtë segmenteve të autostradave në të gjithë vendin në periudhën e ardhshme. Ai tha se ndërtimi është duke u zhvilluar në më shumë se 1.200 vende në Maqedoni sot dhe se kjo është shumë e rëndësishme për Qeverinë sepse angazhon punëtorë vendas, që është një tregues serioz i aktivitetit më të mirë ekonomik, dhe në të njëjtën kohë zgjidh probleme dekadash dhe u siguron qytetarëve një cilësi më të mirë jetese. Drejt fundit të këtij muaji, ndoshta më 26 gusht, tregoi Mickoski, do të fillojë ndërtimi i segmentit të autostradës Bllacë - Shkup, për të cilin, tha ai, kanë përfunduar të gjitha procedurat formale.

Shkup - Inflacioni në Maqedoni në korrik të këtij viti arriti në 2,3 për qind në nivel vjetor, ndërsa çmimet me pakicë në markete u rritën për 1,8 për qind, që e vendos vendin në vendin e dytë me inflacionin më të ulët në rajon, tha kryeministri Hristijan Mickoski. Duke u përgjigjur në pyetjet gazetareske në lidhje me aktivitetet ndërtimore për ndërtimin e sistemit të kanalizimit në vendbanimin Idrizovë në komunën e Gazi Babës, Mickoski vlerësoi se këto janë të dhëna që tregojnë ndryshimin thelbësor në rezultatet ekonomike midis qeverisë aktuale dhe atyre të mëparshme të LSDM-së dhe BDI-së.

Shkup - Mbrëmë rreth orës 2:00 të mëngjesit, një zjarr shpërtheu në një zonë të hapur, pikërisht mbi shtëpitë e fundit në Zelenikovë. Falë popullsisë lokale dhe reagimit të tyre të shpejtë parandalues, si dhe reagimit të shpejtë të kryetarit të Komunës së Zelenikovës dhe zjarrfikësve, u parandalua një katastrofë dhe zjarri u ndalua disa metra larg shtëpive të fundit, informoi drejtori i Drejtorisë për Mbrojtje dhe Shpëtim, Stojançe Angelov. Angellov, në një video nga terreni, raportoi se rreth orës 2 të mëngjesit mori një telefonatë nga një grua me një zë shumë të shqetësuar se zjarri po i afrohej shtëpisë së saj, e cila ndodhet në rreshtin e fundit, në kodrën mbi Zelenikovë.

Tiranë - Kryeministri Edi Rama i tha gazetarit të medias britanike "UnHerd", Aris Rousinos, se protestat e zhvilluara gjatë muajve të fundit në Shqipëri nuk janë më të njëjta me ato të qershorit. Sipas tij, në protestat e fundit janë përfshirë më shumë parti politike dhe grupe të opozitës, përfshirë edhe forca të ekstremit të majtë dhe të djathtë. Kryeministri Rama tha se, pavarësisht tensioneve, ai është "shumë krenar" që protestat janë zhvilluar për ditë me radhë në mënyrë kryesisht paqësore.

Budapest - Dymbëdhjetë persona humbën jetën, ndërsa të paktën 10 u lënduan pasi një autobus polak doli nga rruga dhe ra në një kanal në Hungarinë verilindore - njoftoi sot kryeministri hungarez Peter Magjar në rrjetet sociale. Autobusi polak doli nga rruga herët në mëngjes, pas së cilës ra në një kanal dhe u përmbys, publikoi agjencia gazetareske hungareze MTI.

Moskë - Ukraina kreu një sulm masiv gjatë natës me më shumë se 600 dronë të drejtuar drejt Moskës, njoftoi sot nëpërmjet Telegramit prefekti i kryeqytetit rus, Sergej Sobjanin, siç raportohet nga DPA. Sobjanin tha se mbrojtja ajrore ruse shkatërroi 201 dronë ukrainas në rajonin e Moskës, ndërsa shumica e dronëve u kapën para se të arrinin në rajon.

Madrid - Dy gra humbën jetën në përmbytjet dhe rrëshqitjet e dheut në pjesën veriperëndimore të Spanjës, ndërsa dy foshnje u lënduan, njoftoi shërbimi i shpëtimit në rajonin autonom Kastilja dhe Leon. Viktimat janë dy gra të moshës rreth 60 dhe 80 vjeç, njoftuan autoritetet lokale. Një burrë i cili fillimisht u raportua si i vdekur pas përmbytjeve në fshatin Mansanedo de Valduesa, më vonë u gjet i palënduar.

Sidnei - Australia do të nisë një program të madh për blerjen e armëve të zjarrit në nëntor pas sulmit në plazhin Bondi të Sidneit, në të cilin u vranë 15 persona dhjetorin e kaluar, njoftoi qeveria federale. Programi do të nisë për herë të parë në shtetin e Uellsit të Ri Jugor më 2 nëntor, njoftuan kryeministri australian Entoni Albaneze dhe kryeministri i Uellsit të Ri Jugor Kris Mins. Pronarët që dorëzojnë pushkët ose pistoletat do të kenë të drejtë për kompensim deri në 1,000 dollarë australianë (rreth 700 dollarë) për secilën armë.

Harare - Numri i të vdekurve nga përmbysja e tragetit të mbipopulluar në liqenin Kariba në Zimbabve ka arritur në 72 persona, përfshirë 18 fëmijë, pasi ekipet e shpëtimit nxorën 26 trupa të tjerë, njoftoi policia. Trageti u përmbys të martën për shkak të valëve të forta. Anija po udhëtonte nga qyteti i Karibas drejt fshatrave të largëta dhe komuniteteve të peshkimit në veriperëndim të vendit, ku infrastruktura rrugore është në gjendje të keqe dhe mundësitë e transportit publik janë të kufizuara.

Honolulu - Stuhia tropikale "Lala" është forcuar në një uragan të Kategorisë 1 ndërsa i afrohet Ishullit të Madh të Havait, njoftuan Shërbimet amerikane meteorologjike. Erërat maksimale të qëndrueshme arritën shpejtësinë 120 kilometra në orë, njoftoi Qendra Kombëtare e Uraganeve e SHBA-së. Më parë, një stacion meteorologjik pranë South Point regjistroi erëra të qëndrueshme prej 66 kilometrash në orë dhe shpërthime deri në 102 kilometra në orë.

Bogota - Shpresat për të gjetur të mbijetuar pas tërmetit të fuqishëm në Kolumbinë perëndimore po veniten, ndërsa ekipet e shpëtimit vazhdojnë të nxjerrin trupa nga rrënojat pesë ditë pas katastrofës. Të paktën 294 persona kanë vdekur, 320 janë ende të zhdukur dhe gati 4,000 janë lënduar, sipas shifrave të fundit nga agjencia e menaxhimit të fatkeqësive në Kolumbi. Më shumë se dy të tretat e viktimave u regjistruan në qytetet Kali dhe Pereira.