Shkup, 16 shtator 2026 

Kosova sot po përballet me një moment të rëndë, që kërkon dinjitet, përgjegjësi dhe unitet. Sot askush nga ne nuk guxon të lejojë që historia e Kosovës të njolloset nga një farsë pseudo- gjyqësore dhe e padrejtë.

Tani nuk është koha për kalkulime të ngushta politike, interesa partiake apo protagonizëm individual. Sot shqiptarëve u duhet BASHKIM, UNIFIKIM DHE NJË QËNDRIM I PËRBASHKËT! U duhet një OFENSIVË DIPLOMATIKE e koordinuar, serioze dhe e fuqishme, duke shfrytëzuar të gjitha rrugët politike, diplomatike, juridike dhe kombëtare për të kërkuar drejtësi në shkallën e Apelit.

Përballë një procesi që ngre shqetësime të thella dhe një padrejtësie kaq të madhe, nuk mund të ketë dhjetëra zëra që flasin veçmas, as interesa partiake që e dobësojnë reagimin kombëtar. Kur bëhet fjalë për UÇK-në dhe sakrificën e popullit të Kosovës, përçarja nuk guxon të jetë përgjigjja jonë!

Për vite me radhë, organizimet në mbështetje të UÇK-së janë shfrytëzuar nga individë dhe struktura të ndryshme për interesa politike. KJO DUHET TË NDALOJË! UÇK-ja nuk mund të jetë dekor për karrierë politike, as tribunë për protagonizëm personal. Lufta e saj për liri dhe sakrifica e dëshmorëve janë më të mëdha se çdo parti, individ apo interes elektoral. Sot kërkohet NJË ZË, NJË QËNDRIM, NJË VEPRIM I KOORDINUAR.

Kosova dhe shqiptarët duhet ta kthejnë këtë moment në një angazhim të fuqishëm diplomatik, të bashkërenduar me institucionet e Kosovës, faktorin politik shqiptar dhe miqtë ndërkombëtarë. Nuk mjaftojnë deklaratat dhe reagimet e çastit. Nevojiten veprime konkrete, argumente të fuqishme dhe angazhim i vazhdueshëm në të gjitha nivelet. Sepse drejtësia nuk kërkohet vetëm me fjalë në sheshe. Drejtësia kërkohet me UNITET, DIPLOMACI, ARGUMENTE DHE VEPRIM!

Liria e Kosovës është realitet i ndërtuar mbi sakrificën e një populli. Ajo histori nuk mund të fshihet, as nuk mund të mohohet.

Historia e Kosovës nuk mbyllet me një aktgjykim të padrejtë!

LIRIA NUK GJYKOHET! DREJTËSIA DUHET TË TRIUMFOJË!

Lëvizja Arbëria 

Foto: MIA