Shkup, 16 gusht 2026 (MIA) - Gjendja me zjarret në ambient të hapur gjatë ditës së djeshme ishte vërtet e vështirë, patëm 29 zjarre. Nga këto, 22 janë shuar plotësisht falë reagimit të shpejtë dhe sakrificës së fortë të zjarrfikësve lokalë, ku këto zjarre po zhvilloheshin. Një është vënë nën kontroll, ndërsa gjashtë janë aktive për momentin, tha drejtori i Drejtorisë për Mbrojtje dhe Shpëtim, Stojançe Angellov, në një video të postuar në Jutjub.

 "Për zjarrin në territorin e Makedonski Brodit, në atarin e fshatit Dragov Doll, sot po përdorim pajisje speciale, përkatësisht, menjëherë pranë zjarrit kemi ngritur një pishinë të madhe të improvizuar nga e cila helikopteri do të mbushet me ujë dhe mund ta hedhë atë në zjarrin aty pranë në cikle të shkurtra, që do të thotë se do të kemi një hedhje uji çdo 4-5 minuta, gjë që do t'i ndihmojë ndjeshëm zjarrfikësit vendas dhe ekipin e reagimit të shpejtë të Drejtorisë për Mbrojtje dhe Shpëtim, i përbërë nga 25 zjarrfikës vullnetarë dhe pesë operativë të Drejtorisë, të cilët në thelb përfaqësojnë një model të veçantë për shuarjen e një zjarri pyjor. Ata kanë përfunduar disa trajnime të këtij lloji dhe në pranverë i dërgova në trajnime speciale në Slloveni", tha Angellovi.

 Ai tha se pret që ky zjarr gjatë ditës të shuhet plotësisht.

 "Zjarri tjetër ndodhet në territorin e komunës së Krushevës, pranë atarit të fshatit Borino dhe Zhitoshe. Herët në mëngjes dërgova atje një ekip reagimi të shpejtë të Drejtorisë për Mbrojtje dhe Shpëtim, të përbërë nga 20 zjarrfikës vullnetarë nga Shoqata Vullnetare "Sveti Arhangel" nga Manastiri. Rezultatet janë premtuese. Ashtu si në ditët e kaluara, janë shuar disa zjarre, dhe sot ky zjarr është në prag të shuarjes së plotë. Pres që deri në mesditë të vendoset kontroll i plotë mbi të, pastaj të kryhet një inspektim dhe të shuhet plotësisht, në mënyrë që të mos rrezikojë fshatrat", shtoi Angellovi.

 Zjarri që ka disa ditë që digjet në territorin e Komunës së Studeniçanit, në atarin e e fshatit Gaber, ishte gjithashtu ende aktiv.

 "Ai nuk po e rrit dinamikën e tij, por po lëviz nëpër terren të vështirë për t'u qasur, ndërsa në disa pjesë plotësisht të paarritshëm, prandaj me shumë mundësi do të operojmë me er traktorë gjatë ditës. Gjithçka varet nëse shfaqet një tjetër prioritet i lartë", theksoi Angellovi.

 Zjarri i katërt, në territorin e Komunës së Velesit, tashmë ka depërtuar në zonën e Zelenikovës.

 Në territorin e Komunës së Jegunovcit, mbi fshatin Kopancë, zjarri ende ka qenë aktiv që digjet disa ditë.

 Ai tha se është optimist se zjarri, siç shpjegoi ai, do të vihet nën kontroll të plotë në kohë dhe nuk do të jetë në gjendje të kërcënojë asnjë nga fshatrat përreth.

Ai tha se një katastrofë u shmang mbrëmë në Zelenikovë.

Foto dhe video: Kanali Jutjub i Drejtorisë për Mbrojtje dhe Shpëtim