Shkup, 11 shtator 2026 (MIA)- Grupi parlamentar i LSDM-së dhe koalicionit sot për herë të tretë në Kuvend ka dorëzuar propozim-ligjin për rritjen e pagës minimale, duke kërkuar që ajo të jetë 600 euro, përkatësisht 36.960 denarë, deklaroi në konferencën për shtyp në Kuvend, kryetari i LSDM-së, Venko Filipçe.

Filipçe tha se në këtë situatë krize, me çmimet e larta të karburanteve dhe rritjen e çmimeve të produkteve ushqimore, paga minimale është absolutisht e pamjaftueshme për një jetë të mirë, cilësore dhe dinjitoze të punëtorëve. Sipas tij, mbi 70 për qind e punëtorëve në vend jetojnë me të ardhura ndërmjet pagës minimale dhe pagës mesatare.

"Në këtë moment, paga minimale është 26.000 denarë. Ne besojmë se në këtë situatë krize, me çmimin e madh të karburantit dhe çmimet e rritura të produkteve ushqimore, kjo pagë minimale është absolutisht e pamjaftueshme për një jetë të mirë, cilësore dhe dinjitoze për punëtorët. Mbi 70 për qind e punëtorëve në vend jetojnë me të ardhura midis pagave minimale dhe mesatare. Në kushte kur shporta sindikale arrin pothuajse 70.000 denarë, ose mbi 90.000 denarë nëse llogariten edhe shpenzimet e qirasë ose një kredi për një apartament, paga minimale aktuale mbulon mezi 31 deri në 37 për qind të shpenzimeve totale të një familjeje", theksoi Filipçe.

Ai shtoi se nga shporta minimale sindikale, pothuajse 25.000 denarë, ose një pagë minimale e tërë prej 26.000 denarësh, shkon për produkte ushqimore dhe pije freskuese.

"Nëse kësaj i shtojmë shpenzimet për materiale shkollore, të cilat aktualisht janë pothuajse 7.000 denarë, për transport afërsisht 5.000 denarë, për veshmbathje rreth 6.000 denarë dhe për kujdes shëndetësor 1.100-1.200 denarë, familjet tona punëtore praktikisht nuk mund ta mbijetojnë muajin", ka thënë Filipçe.

Foto: arkivi i MIA-s