Shkup, 8 tetor 2025 (MIA) - Trajtim i njëjtë si kompanitë në zonat e ZZHTI-së dhe zgjidhjen e problemeve të infrastrukturës dhe deponive ilegale në zonën industriale në Vizbeg, kërkojnë biznesmenët e Odës Ekonomike të Maqedonisë Veriperëndimore. Ata i paraqitën këto probleme sot edhe para udhëheqësisë së Lidhjes Socialdemokrate e cila ka kandidat për kryetar të Qytetit të Shkupit.

"Këtë e kemi kërkuar për një kohë shumë të gjatë, më shumë se 10-15 vjet. Edhe sot po përballemi me të njëjtat probleme të infrastrukturës që zonat e tjera në ZZHTI nuk i kanë. Objektet në zonat e ZZHTI-së po ndërtohen pjesërisht me para shtetërore, ndërsa te ne shteti nuk ndihmon asgjë. Ne bëjmë investime me paratë tona dhe kërkojmë të trajtohemi si kompanitë në zonat e ZZHTI-së", tha ushtruesi i detyrës, kryetar i OEMVP-së, Nuhi Aliu.

Zona industriale në Vizbeg, sipas Aliut, meriton më shumë vëmendje nga institucionet kompetente, sepse punëson pesë deri në tetë mijë persona, qarkullimi vjetor është më shumë se 500 milionë, ndërsa pjesëmarrja në BPV është 7.5 për qind.

"Rruga kryesore në dalje nga Shkupi në Kosovë e cila për momentin është në një situatë katastrofike, duhet të riparohet urgjentisht. Ne kalojmë nëpër atë rrugë çdo ditë dhe kemi probleme reale, kushtet e rrugës nuk përputhen me kushtet që duhet të ketë një zonë industriale. Gjithashtu kërkojmë që të zgjidhet problemi i deponive ilegale që herë pas here digjen dhe krijojnë probleme si për biznesin ashtu edhe për Qytetin e Shkupit. Zona ka një rritje ekonomike të paparë. Kemi pesë deri në tetë mijë të punësuar, qarkullimi vjetor është 500 milionë euro, pjesëmarrja në BPV është 7.5 për qind, fitimi është mbi 40 milionë... theksoi Aliu.

Lidhur me inflacionin, Aliu beson se nëse kërkesa rritet, çmimet do të fillojnë të bien dhe për këtë ia vlen të mendohet edhe për intervenim nga rezervat e mallrave.

Sipas liderit të LSDM-së, Venko Filipçe, në katër vitet e fundit autoritetet nuk kanë pasur vesh për problemet e biznesmenëve nga zona industriale në Vizbeg. Ai siguron se sugjerimet e tyre do të përfshihen në programin e tyre.

Një problem tjetër, sipas Filipçes, është mbledhja e rimbursimeve të TVSH-së prej gati njëqind milionë euro për të cilat, siç theksoi, pritet nga nëntë deri në dhjetë muaj.

Kjo, sipas tij, është një nga treguesit e politikave të dobëta ekonomike të qeverisë së VMRO-DPMNE-së.

Foto: MIA