Култура

Поетесата Виолета Сековска постхумно одликувана со Награда за животно достигнување

Ќерката на познатата македонска поетеса Виолета Сековска, Сара Сековска, за време на меѓународната поетска манифестација „Охридски поетски бисер“, ја прими наградата за животно достигнување (постхумно) во чест на нејзината мајка.

Скопје, 27 јуни 2022 

Изминатиот викенд, градот Охрид изобилуваше со поети и поетеси што беа наградени за нивното дело, како и оние што по првпат зедоа учество во седмото по ред издание на меѓународната манифестација „Охридски поетски бисер“.

Оваа година, на распишаниот конкурс за наградени песни и автори на меѓународната поетска манифестација „Охридски поетски бисер“, која се одржа на 25 јуни во црквата Успение на Пресвета Богородица ‒ Каменско во Охрид, се пријавија вкупно 168 автори од Македонија и од странство.

Виолета Сековска

Како и секоја година, и оваа беа доделени следниве награди: прва, втора и трета награда за поезија на домашни автори, прва, втора и трета награда за поезија на странски автори, прва, втора и трета награда за поезија на млади автори, награда на автор од дијаспората и три награди за животно дело, на Иван Котев, Живко Поповски Цветин и постхумно оваа награда ја доби единствената, голема македонска поетеса, Виолета Сековска ‒ како што многумина милуваа да ја наречат.

Нејзината ќерка, Сара Сековска, подигнувајќи ја наградата за нејзината мајка, им се обрати на присутните: „Мајка ми често велеше: Сакајте со срцето и со душата, не преку моќта и парите, зашто моќта и парите заминуваат, срцето и душата остануваат додека очите ни се затворат“ Имено, Виолета Сековска е автор на седум збирки поезија и постхумно издадената збирка ’Бајракот на светлината‘“. Сековска беше основач и претседател на Граѓанското здружение за обединување на македонската култура „Македонски вознес“, креатор и идеен творец на поетско-музичкиот перформанс „Со љубов за Македонија“ со кој има настапувано ширум Македонија, Кралството Данска, Албанија, Хрватска, Србија, Црна Гора и Словенија, член на Светскиот македонски конгрес и голем хуманист, идеен творец и коорганизатор на Хуманитарниот поетско-музички концерт „Од деца за деца со посебни потреби“. Поезијата на Сековска е преведена на повеќе јазици, и тоа англиски, руски, српски, турски, албански, хрватски, словенски, бугарски. Добитник е на голем број домашни и меѓународни награди и признанија.

Сара Сековска

Во центарот на животот во нејзините стихови ја опева љубовта на жената кон љубениот, но истовремено и највозвишената љубов ‒ онаа кон Татковината. Таа ни остави дела што исполнуваат, опиваат, напојуваат со љубов, верба и надеж, убавина, топлина и исконска сила, дела во кои е запишана секоја нејзина мисла од која блика радост за животот и слободата, блеска љубов за љубениот и за земјата Македонска. На 15 јуни 2021 година, таа физички нè напушти, отиде на патот кон вечноста и бесконечноста, но ни остави голем број изградени мостови, воспостави длабоки корени и стави длабок печат со нејзината оригиналност и посебност во македонската творечка дејност.

—————————————————————————————————————————

МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки.

Таг
Back to top button
Close
Close